Shefi mjekësor i Moderna, Dr. Tal Zaks, i cili është një nga anëtarët e komitetit këshillues të vaksinave të FDA, ka mbetur i mahnitur nga rezultatet e marra këtë të shtunë lidhur me efektivitetin e vaksinës anticovid. Ai shprehet se rezultatet mund të ndikojnë në rrjedhën e pandemisë dhe se nuk i fsheh lotët për këtë arritje të shumëpritur.
“Ishte hera e parë që i lejova vetes të qaja, ne kemi një përgjigje të plotë për të ndryshuar rrjedhën e kësaj pandemie.” tha Dr. Tal Zaks.
Sakaq kompania amerikane Moderna kërkon miratimin e vaksinës në SHBA dhe BE. Ajo po u dorëzon të dhëna rregullatorëve në SHBA, Evropë dhe Mbretërinë e Bashkuar për një licencë emergjence në mënyrë që vaksina të përdoret në masë tek qytetarët.
Kompania do t’i kërkojë FDA të rishikojë një grup të zgjeruar të të dhënave që tregon se vaksina është 94.1% efektive në parandalimin e Covid-19 dhe 100% efektive në parandalimin e rasteve të rënda të sëmundjes.
Moderna do të bëhet kompania e dytë që aplikon në FDA për autorizimin e përdorimit emergjent për një vaksinë koronavirus. Pfizer aplikoi më 20 nëntor me të dhëna që tregojnë njëlloj efikasitet të lartë.
FDA do të takohet me komitetin e saj këshillimor në dhjetor për të shqyrtuar aplikacionet e Pfizer dhe Moderna.
Vaksinimet e para në Shtetet e Bashkuara pritet të ndodhin “drejt pjesës së fundit të dhjetorit”, sipas Dr. Anthony Fauci, drejtor i Institutit Kombëtar të Alergjisë dhe Sëmundjeve Infektive.
Në provën klinike të Fazës 3 të Pfizer, vaksina provoi të ishte 95% efektive dhe një pjesëmarrës në studim që mori vaksinën zhvilloi një rast të rëndë të Covid-19.
Deri në fund të vitit 2020, Moderna pret që të ketë afërsisht 20 milion doza të vaksinës së saj të disponueshme në Shtetet e Bashkuara dhe është në rrugën e duhur për të prodhuar 500 milion deri në 1 miliard doza globale vitin e ardhshëm, sipas njoftimit për shtyp të kompanisë të hënën.
(E.G/Faxweb.al)