Ambasada e OSBE-së, ka reaguar lidhur me protestën e paralajmëruar për tu mbajtur më 16 shkurt nga opozita.
Me anë të një postimi në rrjetet sociale, OSBE bën thirrje që kjo protestë të mos jetë e dhunshme, pasi sipas saj, trazirat nuk janë një rrugë e shkurtër për të ardhur në pushtet.
Në vijim, OSBE shprehet se, “Shqipëria ka parë boll dhunë politike në të shkuarën. Çdo kthim në atë kohë vetëm sa do të dëmtonte vendin, veçanërisht tani që ai futet në një periudhë katërmujore vendimtare, kur të gjitha përpjekjet dhe energjitë duhet t’i kushtohen organizimit të zgjedhjeve vendore, të cilat janë një provë e vërtetë për demokracinë”.
Postimi i plotë:
#Deklaratë e Prezencës së OSBE-së në Shqipëri
Shprehim shpresën tonë që protesta politike e së shtunës nuk do të degjenerojë në dhunë. Aspiratat e të gjithë qytetarëve shqiptarë kërkojnë një diskurs politik të pjekur dhe konstruktiv; trazirat nuk janë një rrugë e shkurtër për të ardhur në pushtet. Shqipëria ka parë boll dhunë politike në të shkuarën. Çdo kthim në atë kohë vetëm sa do të dëmtonte vendin, veçanërisht tani që ai futet në një periudhë katërmujore vendimtare, kur të gjitha përpjekjet dhe energjitë duhet t’i kushtohen organizimit të zgjedhjeve vendore, të cilat janë një provë e vërtetë për demokracinë.
(B.B/ Faxweb.al)
