Kreu i PD-së Lulzim Basha ka reaguar lidhur me situatën që u krijua dje në konviktet e Qytetit Studenti, ku kryedemokrati kishte shkuar me ftesë të disa studentëve, për të parë kushtet në të cilët të rinjtë jetonin.
Gjatë vizitës së Bashës, një recepsioniste i kërkoi atij që të largohej, pasi sipas saj ishte e ndaluar që të futej në ambientet ku qendronin studentët.
Bashkia e Tiranës reagoi më vonë, duke thënë se do të ngrite padi ndaj Bashës, ndërkohë që kreu i PD-së shprehet se njerëzit duhet ti japin fund frikës, përballë kësaj qeverie që kërkon të shtypë popullin.
Basha shprehet se koha e kërcënimeve ka marrë fund.
Postimi i plotë i Bashës:
Ngjarjet e mbrëmshme janë një pasqyrë e qartë e realitetit me të cilën përballet Shqipëria.
Mbrëmë isha ftuar nga disa studentë për të parë si jetojnë dhe për të dëgjuar shqetësimet e tyre. Studentët tanë janë e ardhmja e këtij vendi, shqetësimet e tyre janë shqetësimet tona.
Kjo është rruga që kemi zgjedhur ne. Rruga e të dëgjuarit, rruga e përfaqësimit të vërtetë të të gjithë shqiptarëve.
Kur mbërritëm në godinë u takuam me një punonjëse të konviktit, e cila na kërkoi të largoheshim. Kjo porosi erdhi nga lart.
Kjo në fakt është rruga tjetër. Rruga e frikësimit dhe kërcënimit të njerëzve për t’ju mbyllur gojën dhe për ti mbajtur të nënshtruar e nën kontroll.
Për mua politikanët duhet të jenë shërbëtor të popullit, jo e kundërta. Prandaj nuk do të lejoj askënd që të më pengojë të dëgjoj problemet e bashkëqyetarëve të mi dhe të përpiqem t’i ndihmoj ata. Kjo është arsyeja pse u bëra pjesë e jetës publike.
Ju bëj thirrje atyre që kanë zgjedhur rrugën e kërcënimeve dhe intimidimeve që ti vënë gishtin kokës. Askush dhe asgjë nuk do ti ndalë njerëzit që të dëgjohen dhe ta thonë fjalën e tyre.
(E.K/Faxweb.al)