Një efektive e Policisë Rrugore në kryeqytet ka mbërritur mesditën e kësaj të Premte në Spitalin e Traumës e plagosur. Ajo shoqërohej nga kolegët e saj me 3 makina të Policisë Rrugore, ndërsa ajo ndodhej në njërën prej tyre.
Fax News mëson nga burime të sigurta se efektivja është Arta Shurbi rreth 40-vjeçe. Pasi ka zbritur nga makina ajo është shoqëruar për ndihmë mjekësore me barrelë. Burime paraprake bëjnë me dije se nuk ka marrë fraktura të rënda. Fax News mëson se Shurbi është goditur nga një kamion i tonazhit të rëndë teksa ishte në punë.
Njoftimi i plotë i policisë: Tiranë/Informacion
Më datë 15.01.2021, rreth orës 12:55, tek Cassa Italia, mjeti me drejtues K. V, ka aksidentuar punonjësen e policisë të qarkullimit rrugor shtetasen A. Sh, aktualisht në shërbim, e cila u dërgua në spital dhe ndodhet jashtë rrezikut për jetën.
Grupi hetimor dhe sherbimet e Policisë vijon punën për sqarimin e rrethanave të aksidentit.