AktualitetFlashKryesoreTe FunditTe Gjitha

“Hetimet e Prokurorive për ndërtimet, fasada”, avokati: Janë marrë zarfe në këmbim të firmës, kanë kursyer hekurin

Avokati Kastriot Frashëri komentoi lëvizjet e prokurorisë për të nisur hetimet për ato ndërtesa që u shembën si pasojë e tërmetit 6.4 ballë që gjunjëzoi Shqipërinë të martën. Duke folur në studion e Fax News, Frashëri deklaroi se këto lëvizje janë thjesht fasada.

Sipas tij, përmes hetimeve, qeveria po kërkon të shesë tek qytetarët se po punon dhe se po përpiqet të rregullojë gjërat.

“Fakti që qeveria ose kryeminsitri po kërkon që të nxirren përgjegjësit, siç ishin edhe lëvizjet e prokurorive për të filluar hetimet, unë e thashë ndoshta në princip ajo është e drejtë dhe qëndron. Por nisur edhe nga çfarë është diskutuar deri më sot, më duket se këto janë vetëm fasada që ne t’i themi popullit shqiptar që qeveria tani ka filluar të lëvizë.

Janë gati 30 vjet ku gjithçka është ndërtuar mbrapsht. Unë çuditem pse orientimi qeveritar është për t’u vënë para përgjegjësisë ata persona që nuk kanë zbatuar ligjin, por nuk fillon me ndërtuesit sepse maskarada e parë fillon me biznesin”, tha avokati.

Ai tregoi edhe arsyet se pse pas tërmetit 6.4 ballë një pjesë e pallateve u shembën, ndërsa të tjera jo. Kastriot Frashëri shpjegoi se ato pallate që ranë do të thotë se janë ndërtuar keq, pa hekur dhe pa cilësi të betonit.

“Ata kanë kursyer hekur, kanë kursyer cilësinë e betonit. Kolonat nuk i kanë ngjitur me njëra tjetrën, por i kanë lënë për lokale. Është një mish-mash i tërë”, tha Frashëri gjatë intervistës në studio.

Sipas avokatit, me ndërtimet është bërë një maskaradë e vërtetë sepse leja është marrë për pallat 7-katësh, por në të vërtetë është ndërtuar me 10 kate. Ai vijoi më tej duke thënë se një gjë e tillë është lejuar në këmbim të zarfeve me lekë.

“Nisur nga realiteti, do të themi disa të vërteta. Ka qenë një babëzi sepse kompanitë e ndërtimit drejtuesit teknikë nuk i kanë pasur fizikisht aty, por kanë dhënë licencën për 100 apo 200 mijë lekë të vjetër. Nuk ka qenë fizikisht. Këtu duhet të ngrenë zërin këto Inspektoratet e Ndërtimit, policia bashkiake, ku janë këta njerëz? Ku kanë qenë? Është momenti për të thënë të vërtetat. E kanë marrë lejen për 7 kate, por e kanë bërë me10 kate. Këta ua kanë legalizuar edhe këto shtesa katesh.

Përpara ligjit duhet të dalin të gjithë autorët që kanë shpërdoruar detyrën. Vetëm atëherë shoqëria shqiptare do të bëjë një katarsis vetë, do të pastrohet. Nëse nuk ndodh kjo, atëherë të tjera gjëra do të ndodhin. Fakti që ata që bëjnë certifikimet e këtyre objekteve marrin zarfe në këmbim të firmës së saj, atëherë këtu është kompromentuar gjithçka, është kompromentuar siguria publike, siguria juridike”, deklaroi avokati Kastriot Frashëri për Fax News.

(M. I./ Faxweb.al)

Fjalët Kyce

Artikuj të Ngjashëm

Leave a Reply

Your email address will not be published. Required fields are marked *