Një oreks i pangopur për këmbët e bretkosave mes francezëve dhe belgëve po i çon speciet në Indonezi, Turqi dhe Shqipëri në prag të zhdukjes, sipas një raporti.
Evropa importon rreth 200 milionë bretkosa të egra çdo vit, duke kontribuar në një varfërim serioz të specieve vendase jashtë vendit.
Shkencëtarët vlerësojnë se bretkosa e ujit të Anadollit mund të zhduket në Turqi deri në vitin 2032, për shkak të mbishfrytëzimit, ndërkohë që specie të tjera si bretkosa e ujit shqiptar janë tashmë të kërcënuara.
Kuotat e eksportit për bretkosën Javane të Indonezisë janë tërhequr gjithashtu në një lëvizje që konservatorët dyshojnë se mund të jetë si rezultat i varfërimit të popullsisë.
Dr Sandra Altherr, bashkëthemeluesja e shoqatës bamirëse për mbrojtjen e kafshëve të egra Pro Wildlife, e cila ishte bashkëautor i raportit tha: “Në Indonezi, si tani edhe në Turqi dhe Shqipëri, speciet e mëdha të bretkosave po pakësohen në natyrë, njëra pas tjetrës, duke shkaktuar një efekt domino fatal për ruajtjen e specieve.”
“Nëse grabitja për tregun europian vazhdon, ka shumë të ngjarë që ne të shohim rënie më serioze të popullatave të bretkosave të egra dhe, potencialisht, zhdukje në dekadën e ardhshme.”
Charlotte Nithart, presidentja e OJQ-së franceze Robin des Bois, e cila bashkë-shkruajti punimin, tha: “Bretkosat luajnë një rol qendror në ekosistem si vrasës të insekteve – dhe aty ku bretkosat zhduken, përdorimi i pesticideve toksike po rritet. Prandaj, tregtia e këmbëve të bretkosave ka pasoja të drejtpërdrejta jo vetëm për vetë bretkosat, por për biodiversitetin dhe shëndetin e ekosistemit në tërësi.”
