Rreth 2500 punëtorë kanë dalë sërish në protestë mëngjesin e sotëm pranë ambjenteve të fasonërisë ku punojnë, për shkak se detyrohen nga eprorët e tyre që të hyjnë në fabrikë, edhe pse nuk ka asnjë masë parandaluese për marrjen e koronavirusit.
Mësohet se kompania quhet “Alba Shoes” ndërsa është zhvendosur në vendin ku momentalisht ushtron aktivitetin prej 3 muajsh.
Punonjësit që janë të punësuar aty mësohet se janë të lagjes Shkozë ndërsa bëhet e ditur se janë rreth 2500 të tillë.
Ata shprehen në denoncimin e tyre për Faxweb.al se policia ka qenë e pranishme mëngjesin e sotëm përpara kompanisë, por nuk ka ndërhyrë në favor të tyre.
Mësohet se pronarët dhe disa eprorë të kësaj fabrike janë kthyer nga Italia disa ditë më parë ndërsa punëtorët janë shprehur të shqetësuar pasi dyshojnë se mund të jenë të infektuar me koronavirus.
“Sot na thanë o hyni brenda dhe nisni punën, ose merrni librezat edhe ikni”, shprehen disa prej punonjësve.
Protesta e punonjësve nisi që prej ditës së djeshme ndërsa eprorët kanë dashur ta mbajnë të fshehtë incidentin, pasi kanë kërkuar që punonjësit të vijojnë punën pavarësisht se rrezikojnë të marrin ndonjë infeksion, ndërsa në fasonëri mbërritën edhe disa efektivë policie.
Ndërkohë që mëngjesin e sotëm ka pasur protesta dhe në një fabrikë pranë ish-uzinën e metalurgjikut në Alidem, ku punonjësit po ashtu nuk duan që të nisin punën.
Biznesi fason dhe call centerat, janë bizneset që kanë problematikën më të madhe në këto ditët e para të mbërritjes së koronavirusit, pasi përqendrimi i njerëzve është shumë i madh dhe distanca mes tyre nuk respektohet.
Lexo edhe:
(E.K/Faxweb.al)
