Ish-deputetja e Partisë Demokratike, Jorida Tabaku ka bërë një deklaratë për shtyp nga selia blu këtë të hënë, nga ku u shpreh se në datë 25 prill do të marrë fund qeveria që punon për 20%-shin e mafias dhe të korrupsionit.
Deklara vjen pas disa përgjimeve të fundit të publikuara nga mediat italiane, të cilat nxjerrin në dritë fakte nga investimet që bëjne mafia e shtetit fqinj, sipas të cilave thuhet se janë investuar edhe në Shqipëri rreth 250 milionë euro.
Këto përgjime kanë shkaktuar debat midis opozitës dhe mazhorancës, në të cilin është përfshirë dhe kreu i grupit të PS-së, Taulant Balla, i cili u shpreh ditën e sotme qe një nga eurodeputet e përfshirë në përgjim është mik i Lulzim Bashës.
Për këtë deklaratë të Ballës është ndalur të flasë dhe Tabaku, e cila thekson se përpjekjet patetike të Ballës nuk do të funksionojnë.
Deklarata e plotë e Tabakut:
Këtë javë doli në dritë një korrupsion në shkallë të gjerë në Shqipëri. Korrupsion galopant i udhëhequr nga mafia dhe i ushtruar me miratimin e Erion Veliajt dhe Edi Ramës.
Janë 1000 faqe përgjime të antimafias italiane, ku përshkruhet mënyra sesi bëhen pazaret për tenderat, koncesionet, PPP-të dhe ndërtimet në Shqipëri. 20%-shi është pjesa për pushtetin e Edi Ramës, dëshmi e gjallë e asaj që po ndodh në Shqipëri prej 8 vjetësh.
Edi Rama hesht. Kukulla e tij në bashkinë e Tiranës ka mbyllur gojën.
Arsyeja pse Rama nuk flet dhe Veliaj po shmang përgjigjet e vërteta dhe po justifikohet është e qartë për të gjithë. Ata e dinë se sa thellë janë futur në këtë biznes me mafian.
Ndërkohë që Rama dhe Veliaj janë të fokusuar në punët e tyre të pista me mafian, shqiptarët janë gjithnjë e më shumë të papunë, investitorët seriozë largohen, ekonomia e pjesës dërrmuese të familjeve shkon drejt rrënimit, mijëra të rinj e të rinj largohen nga vendi.
Kundrejt rryshfetit 20%, Edi Rama dhe kukulla e tij në bashki e kanë shndërruar vendin në një parajsë për pastrimin e parave, duke dhunuar ligjin dhe duke shkatërruar konkurencën.
Përgjimet e antimafias italiane janë një provë më shumë se Rama dhe njerëzit e tij shqetësohen vetëm për veten dhe jo për popullin shqiptar.
• Ata po trefishojnë pasurinë e tyre, ndërsa ekonomia shqiptare po kolapson.
• Ata bëjnë biznes me mafian në vend që të krijojnë vende pune për qytetarët.
• Ata hanë darka luksoze në Dubai, kur vendi është i përmbytur.
Mafia dhe pastrimi i parave nuk sjell vende pune, nuk prodhon mirëqenie, nuk ofron investime reale dhe të besueshme për ekonominë dhe qytetarët.
Mafia dhe lavatriçja e parave të pista prodhon vetëm shkatërrim, dhe mjerim për çdo familje që jeton me punë të ndershme.
Të dashur qytetarë!
Këto 8 vjet të Edi Ramës në pushtet na kanë mësuar një gjë: Se kjo është një qeveri që kujdeset vetëm për vete dhe paratë e saj.
Vëmendja dhe synimi i kësaj qeverie dhe i këtij kryeministri nuk është barazia apo konkurenca, por korrupsioni dhe monopoli.
Përpjekja patetike nga Taulant Balla nuk do të funksionojë. Kjo është ajo që ata bëjnë.
o Ata dështojnë.
o Ata korruptojnë.
o Ata marrin paratë tuaja dhe i fusin në xhepat e tyre.
Ne do ta ndryshojmë këtë!
Në 25 Prill historia e një qeverie që punon për 20%-shin e mafias dhe të korrupsionit do të marrë fund.
Është koha për ndryshim!
* Ne do të sjellim ndryshimin!
* Ne do të shpëtojmë vendin nga mafia, nga Rama, nga kukulla e tij në Bashkinë e Tiranës dhe nga miqtë e tyre.
* Ne do të ndërtojmë një qeveri që kujdeset për qytetarët e Shqipërisë.