Kryetari i Bashkisë së Tiranës, Erion Veliaj, ka inspektuar së fundmi linjës urbane Kinostudio-Kombinat në kuadër të inspektimit të linjave të transportit urban që ka për qëllim rritjen e cilësisë së shërbimit për qytetarët dhe nxitjen e investimeve për modernizimin flotave të autobusëve nga operatorët privatë.
Ai u shpreh për linjën Kombinat-Kinostudio se është një nga linjat më funksionale në Tiranë, edhe për faktin se ka një proporcion të barabartë mes autobusëve normalë dhe atyre fizarmonikë, çka na ndihmon për fluksin e mëngjesit.
Për të ndihmuar lehtësimin e lëvizjes në orët e mëngjesit, ai bëri të ditur se po shikohet mundësia edhe për një koordinim me institucionet e tjera, në mënyrë që jo të gjithë punonjësit të nisin punë në të njëjtin orar.
Ai nënvizoi se operatorët do të vijojnë të monitorohen me rreptësi, jo vetëm nëpërmjet inspektorëve në terren, por edhe nëpërmjet përdorimit të teknologjisë.
“Unë besoj se frika është ajo që e ruan vreshtin, ndaj jo vetëm që do të vazhdojmë me kontrollet e Agjencisë për Mbrojtjen e Konsumatorit, por po vendosim edhe sistemin GPS, që të kemi mundësi të kontrollojmë në kohë reale ku ndodhen ekzaktësisht autobusët, si po shërbejnë dhe sa e kanë frekuencën”, u shpreh kryebashkiaku. (XH.A/SHUPLAKA)
Discussion about this post