Gjykata e Posaçme ka lënë në burg kreun e bashkisë së Bulqizës Lefter Alla, sa i takon tenderit prej 322 milionë lekë me ujësjellësin.
Alla u arrestua pak ditë më parë, teksa të përfshirë janë edhe nënkryetarja e bashkisë dhe disa zyrtarë të tjerë.
Arrestimi i tyre është bërë pasi akuzohen se kanë favorizuar të afërmin e Allës, Aqif Koneshën, i cili ka kryer punimet e ujësjellësit të ri.
“E dyta edhe në Bulqizë ka jetë, por ai popull në qoftë se është pa bukë le të mbesin edhe pa atë kanal, le të mbesin edhe pa atë ujë. Nuk ka asgjë të keqe. 90% e punimeve janë të kryera. Nuk ka hetuar fare prokuroria se si është problemi në terren. Megjithatë mos të paragjykojmë, të vazhdojnë hetimet. Le të shohim”, tha avokati i tij pas seancës.
Nga hetimet ka dyshime të forta se kryebashkiaku Alla, në bashkëpunim me nënkryetaren e Bashkisë Lleshi, si edhe punonjësit e tjerë kanë favorizuar dy kompanitë ‘BOE Egland shpk’, dhe ‘BE-IS shpk’, gjatë procedurës së prokurorimit publik. Ky favorizim i këtyre dy kompanive është bërë me qëllim që më pas punimet për ujësjellësin t’i kryejë kompania ‘OE 2AF Albania shpk’, e cila është në administrimin e të afërmit të Allës.