Drejtoresha e Përgjithshme e Tatimeve, Vasilika Vjero, bëri të ditur gjatë një takimi të zhvilluar këto ditë, se gjatë sezonit turistik, qasja ndaj biznesit do të jetë e mbështetur në modelin e analizës së riskut.
Thënë ndryshe, do të ketë vizita fiskale, kontrolle nga zyra, ndërhyrje në territor në ato raste kur do të konstatohen parregullsi.
“Administrata tatimore është institucioni që garanton ushtrimin e aktivitetit në kushtet e konkurrencës së ndershme. Nga kjo pikëpamje është detyrë e jona të sigurohemi përmes strukturave të posaçme të monitorimit dhe kontrollit, frenimin dhe goditjen e çdo fenomeni të shmangies nga detyrimet fiskale, në respekt të ligjit dhe sipërmarrjes së ndershme”, u shpreh ajo.
Gjatë kësaj mbledhje, Komiteti i Përmbushjes shqyrtoi planin e masave për garantimin e ofrimit të shërbimeve konform legjislacionit si përputhja e çmimit të afishuar dhe dokumetuar në pajisjet dhe dokumetacionin fiskal si një përgjegjësi e përbashkët që turistëve vendas dhe të huaj t’ju ofrohet një trajtim korrekt.
(XH.A/SHUPLAKA)
