Ka nisur me debate mbledhja e radhës e Komisionit Hetimor Parlamentar për çështjen e inceneratorëve.
Drejtuesja e këtij komisioni, Jorida Tabaku, tha se një prej dëshmitareve që do të pyetej për herë të dytë, Arjola Kodra, nuk është paraqitur në mbledhjen e sotme.
Tabaku paralajmëroi se nëse ajo nuk do të vinte në mënyrë vullnetare, ajo do të kërkonte ndërhyrjen e policisë për ta sjellë forcërisht.
Sipas Tabakut, Kodra, e cila është një prej aministratoreve të kompanive të inceneratorëve, ka pasur njohje të vjetra me Klodian Zoton dhe Stela Gugallin, gjë të cilën nuk e ka deklaruar në dëshminë e parë të saj në Komisionin Hetimor.
“Arjola Kodra tha këtu gjëra të pavërteta, unë kam siguruar fakte dhe prova që njohjet e saj me personat e shpallur në kërkim janë më të hershme.
Zonjën Kodra megjithëse kemi 20 minuta që e presim, nuk është shfaqur në Komision. Une i kërkoj stafit të Komisionit Hetimor që të vendosemi në kontakt me të.
Të gjejmë një numër telefoni, ta rithërrasim edhe një herë në drekë, në thirrjen e tretë, nëse nuk paraqitet, për zonjën Kodra ne do të bëjmë të njëjtën procedurë që propozuam per z. Loran Dusha, do të njoftojme shërbimet e Policisë se Shtetit për ta sjellë këtu me forcë” , tha Tabaku, ndërkohë që deputeti Arben Pëllumbi u shpreh i bindur se ka pasur paqartësi në komunikim, dhe jo një mungesë gadishmërie nga ana e Kodrës, për të dëshmuar në Komision.
Tabaku kërkoi po ashtu nga socialistët, që gjatë ditës së sotme të merret në pyetje dhe gazetari Artan Rama, kërkesë e cila nuk u pranua prej tyre, derisa të shprehet këshilli i rregullores./faxweb.al
