Trajtimet që janë përdorur tek personat e infektuar nga Sars Cov2 kanë qenë nga më të ndryshmet. Mjekët gjithnjë e më shumë në mbarë botën po verifikojnë dhe po mësojnë se cilat nga barnat ka luajtur një rol mjaft të rëndësishëm në trajtimin e simptomave dhe përmirësimin e gjendjes shëndetësore tek pacientët e prekur.
Gjatë këtij viti pandemie, të gjithë mjekët kanë rënë dakord se risku kryesor i pacientëve me Covid-19 janë fenomenet trombotike, pra ato që lidhen me mpiksjen e gjakut. Në fakt për parandalimin e trombozave edhe në të kaluarën pacientëve ju është rekomanduar aspirina. Edhe tek pacientët me Covid, aspirina është përshkruar në recetat që kanë lëshuar mjekët.
Studimi më i fundit vjen nga studiuesit e Universitetit “George Washington”, në Washington DC (SHBA) të cilët studiuan efektin e aspirinës dhe gjetjet i botuan në revistën prestigjioze Anesthesia & Analgesia, organ zyrtar i Shoqatës Ndërkombëtare të Kërkimit mbi Anestezinë.
Në këtë studim u përfshinë 412 pacientë, të cilën ishin të shtruar në spital, nga të cilët një pjesë e konsiderueshme rreth 312 nuk kishin marrë aspirinë dhe 98 prej tyre e kishin marrë këtë medikament vetëm 7 ditët e para të trajtimit ose 24 orë pas shtrimit.
Ajo që vunë re ishte shumë mbresëlënëse, ky medikament kishte ulur ndjeshëm vdekshmërinë, riskun për t’u shtruar në terapi intensive, apo edhe riskun për ventilim mekanik.
I ftuar në “Wake Up”, epidemiologu klinik Ilir Alimehmeti tregoi edhe kategoritë që nuk mund ta marrin aspirinën.
“Aspirina është ndër mjekimet më të vjetra që kemi. U bënë shumë dekada që e përdorim, i lirë, me pak efekte anësore dhe përdoret kryesisht për parandalimin e eventeve kardiake, sepse nuk lejon formimin e trombeve. Dhe të Covidi, ky është problemi kryesor, pra formimi i trombeve.
100 mg ditore aspirinë është krejtësisht e tolerueshme për trupin, shumë e thjeshtë për t’u marrë dhe shumë e lirë.
E vërtetuar apo jo, kostot janë minimale, efektet janë minimale, është medikament i njohur mirë, unë vetë e kam përdorur.
Ka edhe raste që aspirina nuk jepet dot. Te ata që kanë reaksion, nuk e marrin dot. Personat me probleme në stomak, nuk e marrin dot dhe personat që kanë probleme me gjakun e hollë, nuk mund t’ua hollosh më shumë se ç’duhet”, tha ai.