Kryeministri Edi Rama teksa ka qenë sot në zonën e Rrajcës në Prrenjas, nuk ka kursyer as ironinë dhe batutat në drejtim të kryebashkiakes së LSI-së Miranda Rira. Kjo e fundit nuk ishte e pranishme në takimin e Ramës për fshatrat turistikë, pasi vetëm dy ditë më parë është bërë nënë.
Duke e uruar për lindjen e fëmijës së saj, Rama ka këmbëngulur që pas 30 Qershorit, Prrenjasi do të drejtohet nga PS, ndërsa shtoi “do t’i japim kohë Mirandës të merret më shumë me fëmijën”, duke iu referuar kështu zgjedhjeve lokale.
“I keqardhur për mungesën e kreut të bashkisë. I uroj dhe 100 bebes së sapolindur të Mirandës dhe kam besim dhe bindje që do t’i krijojmë të gjitha mundësitë Mirandës që të fokusohet tek bebja pas 30 qershorit”, tha Rama në fjalën e tij.
Miranda Rira prej disa muajsh tashmë është në një betejë të japur me qeverinë socialiste, për shkak se i është bllokuar buxheti i Bashkisë, duke qenë se këshilltarët e majtë i kanë dalë kundër.
“Kjo është një lojë politike, është diçka që është bërë qëllimisht. Taulant Balla e quan Prrenjasin si bastionin e vet, don të zhvillojë bizneset e veta dhe kjo është arsyeja se përse është krijuar kjo situatë.
Ky është një urdhër nga deputeti që deri në zgjedhje të pengohet me çdo kusht puna e kryetarit të bashkisë. Kemi thirrur mbledhje të vazhdueshme, por në asnjërën prej tyre nuk kanë ardhur anëtarët e majtë, pasi nxjerrin shpesh justifikime të pakuptimta për mungesën”, deklaroi Rira pak kohë më parë në Fax News për këtë çështje. (Lexo ketu)
(E.K/FAXWEB.AL)
Discussion about this post