Një Magazinë e mbushur me silazh “jonxhë dhe foragjere”, ushqim për bagëtitë në lagjen “Uznovë” është përfshirë nga flakët mesditën e sotme. Ende nuk dihet sesi ka rënë zjarri brenda magazinës që ishte e mbyllur por përhapja e shpejtë e flakëve ka trembur banorët e disa shtëpive afër saj, të cilët kanë njoftuar Zjarrëfikësen.
Magazina e përfshirë nga flakët ndodhej pranë Fabrikës së lëkurëve dhe një fabrike që fatmirësisht nuk pati asnjë problem pasi forcat zjarrëfikëse bënë të mundur lokalizimin e flakëve në një kohë të shkurtër, ndërkohë që rreth 30-minuta më pas u mundësua edhe shuarja e flakëve të zjarrit.
Si pasojë e zjarrit u shkrumbuan totalisht brenda Magazinës 60 balla me ushqim për kafshët, jonxhë e foragjere. Këto ishin rezervat e ushqimeve që banorët e zonës i ruajnë për të ushqyer bagëtitë gjatë stinës së dimrit. Ende nuk dihet nëse zjarri ka qënë i qëllimshëm apo jo, ndërkohë që po punohet për zbardhjen e shkaqeve të tij.
