Policia e Shkodrës ka arrestuar ditën e sotme një nga autorët e ngjarjes së 28 nëntorit 2020, ku mbeti i vrarë 46 vjecari Ridvan Hysenaj.
Hysenaj u vra të shtunën e 28 nëntorit 2020 brenda makinës së tij nga persona që lëviznin me një motorcikletë.
Hydajet Mehmedaj është personi i arrestuar ditën e sotme nga Policia e Shkodrës si një nga 3 autorët e dyshuar të kësaj ngjarjeje.
Një nga autorët me inicialet M.Gj., u arrestua ditën e vrasjes, ndërsa, autori i tretë, Duel Mehmedaj, është shpallur në kërkim.
Dyshohet se është pikërisht Duel Mehmedaj ekzekutori i Ridvan Hysenajt, ndërsa vëllai i tij i arrestuar ditën e sotme, dyshohet se ka qenë me të në momentin e vrasjes.
Njoftimi:
Shkodër
Finalizohet operacioni policor i koduar “Mushan”.
Vihet në pranga një nga autorët e ngjarjes së ndodhur më datë 28.11.2020, ku mbeti i vrarë shtetasi R. H.
Nga strukturat e posaçme të DVP Shkodër, në bashkëpunim me Komisariatin e Policisë Shkodër, pas informacioneve të marra në rrugë operative dhe punës së mirorganizuar u bë kapja dhe ndalimi i shtetasit të shpallur në kërkim:
Hydajet Mehmedaj, 34 vjeç, banues në fshatin Mushan, Shkodër.
Arrestimi i këtij shtetasi u bë pas informacioneve të marra dhe lokalizimit të tij në një bar-kafe në fshatin Mushan, Shkodër.
Ky shtetas, në bashkëpunim me shtetasit D. M. (i shpallur në kërkim) dhe M. Gj. (i arrestuar ditën e ngjarjes), më datë 28.11.2020, ka vrarë me armë zjarri shtetasin R. H., 46 vjeç, banues në fshatin Darragjat, Shkodër.
Për shtetasin Hydajet Mehmedaj, Prokuroria e Rrethit Gjyqësor Shkodër, më datë 01.12.2020, ka nxjerrë urdhër ndalimi për veprat penale “Vrasja me paramendim” kryer në bashkëpunim dhe “Mbajtja pa leje e armëve dhe municionit”.
Materialet iu referuan Prokurorisë së Rrethit Gjyqësor Shkodër, për veprime të mëtejshme.
(E.H/Faxweb.al)