Kryeministri Edi Rama ka përsëritur këtë të martë gjatë një takimi elektoral në Kolonjë se drejtuesit e vërtetë të opozitës janë ish-Kryeministri Berisha dhe Presidenti Ilir Meta.
Teksa sulmonte kundërshtarin e tij, Lulzim Basha, për të cilin u shpreh se nuk është lider, Kryeministri Rama njohu tërthorazi një meritë të ish-qeverisë Berisha, konkretisht rrugën e Kombit.
Më tej, Rama iu rikthyer kritikave ndaj paraardhësit të tij, duke u shprehur se është e turpshme sesi Berisha tremb qytetarët duke thënë se vaksinat po vrasin njerëz.
“Do t’i çojmë eksportet bujqësore mbi 1 miliardë lekë. Kush thotë kjo nuk mund të bëhet, i them që ne kemi sot dyfishin e tokës që punohet. Kemi 230-250 mijë hektarë. Të tjerët janë ata që çdo ditë infektojnë njerëz. Çdo ditë mbledhin njerëz dhe i infektojnë. Kanë dalë rrugëve me një demek program. Programi i tyre është menu, çfarë dëshiron t’i ta plotësojnë ata. Ata pikërisht këtë bëjnë sot, sapunin për djathë kush ta hajë le ta hajë, pastaj pas zgjedhjeve shko merr tramvajin e Tiranës. Shëndetësia ishte katastrofe. Jo vetëm që ne u gjetëm të përgatitur, por shëndetësia jonë është gati të bëjë hapin tjetër të madh, sepse nuk mundesh dot ta luftosh deri në fund atë korrupsionin që i nxin jetën njerëzve në spitale, pa bërë disa hapa të tjerë.
Sot po. Spitali i ri në Fier është një qendër e transferimit të dijes. Të gjithë atë dije që ka fituar Turqia do e transmetojë te ne. Është e pamundur që të diskutohet alternativa midis PS dhe partisë që ka në kokë Berishën dhe Metën. Se Luli dihet. Dhëndrri i buzëqeshur që është nxjerrë përpara. Kumbarët e vërtetë janë Saliu dhe Iliri. Flasin që kanë vdekur njerëzit nga vaksinat. Turp, s’ka më turp, të luash me jetën e njerëzve që janë të ankthosur mbi një vit për të dalë nga kjo situatë. Si ka mundësi, ndodh një tërmet këta janë me tërmetin. Si nuk u bënë një herë me Shqipërinë dhe shqiptarët. Të paktën të mos shpifin, të mos shpërndajne lajme të rreme. Ky është kulmi.
Vaksinat të marrin jetë. Përkundrazi vaksinat po kthejnë jetë. Shqipëria do të buzëqeshë shumë shpejt, ashtu siç po buzëqeshin gjyshër e gjyshe në të gjithë Shqipërinë. U izolua një brez i tërë komplet, ndërkohë që ata marrin frymë lirisht, del Saliu me gogolin e tij digjital. Po çfarë bënë këta. Thonë rruga e Kombit, rruga e Kombit, po ja e lëmë atë. Po çfarë bënë këta. S’kanë çfarë i kërkojnë Shqipërisë. Këta mbeten në xhep të gogolit digjital. Kjo është një sfidë që ne nuk e kemi me ta. Ne e kemi me veten dhe me të ardhmen. Në mes të luftës, nuk mund të ndalojmë tani dhe të bëjmë eksperimte. Të përsërisësh të njëjtën gjë dhe të presësh rezultat tjetër, është budallëk . Shqiptarët e përsëriten dy herë, tani s’ka më,” deklaroi Rama.
(E.H/Faxweb.al)