Eksperti i Ekonomisë, Dritan Shino në një intervsitë për Fax News i ftoi qytetarët shqiptarë që të mos kursenin për të përballuar krizën pasi kjo do e vështirësonte më shumë situatën e konomike.
“Unë do t’i ftoja qytetarët shqiptarë të mos kursenin. Shtërngimi dhe kursimi e vështirëson akoma më shumë situatën e konomike dhe mund të gjendesh ndonjë ditë të bukur që të gjitha ato kursime që ke futur në jastëk apo në llogarinë bankare të mos vlejnë aq sa duhet për të përmbushur objektivat me të cilat u kursyen. Kjo sepse paraja e madhe në qarkullim, do të thotë inflacion, zhvlerësim rritje çmimesh e me rradhë”-tha eksperti.
Ndërsa më tej, Shino tha se këtë situatë me rritjen e çmimeve do ta vuanin të gjithë përveç shtresës që i siguron të ardhurat nëpërmjet PPP-ve dhe tenderave publikë.
“Ka një shtresë në republikën e Shqipërisë që nuk ka për të vuajtur. Kjo është një shtresë që pasurinë e saj nuk e bën në treg por përmes buxhetit të shtetit. Ky grumbull njerëzish që përfitojnë para në formë PPP-shë dhe tenderash nuk kanë për të vuajtur. Të gjithë ne të tjerët do vuajmë. Qeveria ka pak për të bërë dhe ajo që duhet të bëjë është të ndihmojë shtresat në nevojë”-shtoi Shino.
