Komisioni Qëndror i Zgjedhjeve ka bërë publik një denoncim të ardhur në institucion përkundrejt deputetit të PS-së në qarkun e Fierit Bujar Çela, i cili përmes disa fotove të publikuara në Facebook shfaqet duke shpërndarë certifikata legalizimesh 4 muaj përpara zgjedhjeve.
Në lidhje me këtë çështje KQZ do të zhvillojë një seancë dëgjimore me drejtorin e A.SH.K Lushnje, për të marrë shpjegime si dosjet e legalizimeve përfunduan në dorën e deputetit socialist.
Deputeti i PS-së, Çela i shpërndau fotot me 28 dhjetor 2020 dhe më pas u denoncuan nga anëtari i Komisionit Rregullator në KQZ, Muharrem Çakaj. Sipas Cakaj, deputeti ka shkelur Aktin Normativ për veprimtaritë e ndaluara para zgjedhjeve, duke shpërndarë leje legalizimi.
Njoftimi i plotë:
Në Komisionin Qendror të Zgjedhjeve, janë raportuar dy denoncime në ndërfaqen e “Aktiviteteve të Ndaluara”, në rubrikën “Kallëzo”, për veprimtaritë e deputetit të PS, Qarku Fier, z. Bujar Çela, i cili ka publikuar në llogarinë e tij personale në Facebook disa foto me qytetarë të ndryshëm duke shpërndarë leje legalizimi të shtëpive të tyre në Njësinë Administrative Hyzgjokaj.
Bazuar në denoncimet e raportuara, Komisioneri Shtetëror i Zgjedhjeve, ditën e hënë, më datë 11.01.2021, ora 12:00, zhvillon seancën dëgjimore për shkelje të parashikuara në vendimin nr. 9, datë 24.12.2020 të Komisionit Qendror të Zgjedhjeve, meZ. Arben Qalliu, Drejtor i Drejtorisë Vendore i A.SH.K Lushnjë.
Bazuar në nenin 47 dhe 87 të ligjit nr. 44/2015 “Kodi i Procedurave Administrative”, z. Qalliu ka të drejtën të paraqitet vetë ose me mbrojtës ligjor për të dhënë shpjegimet e tij, ditën e hënë, më datë 11.01.2021, në adresë Rr.Ibrahim Rugova, nr.4, Tiranë.
Discussion about this post