Gjykata Kushtetuese ka rikthyer sërish në Kuvend çështjen e mandatit të depuetetes Olta Xhaçka. Kërkesa e 14 deputetëve të PD është pranuar nga Gjykata Kushtetuese, për ta shfuqizuar vendimin e Parlamentit që miratoi raportin e mazhorancës për të mos e çuar mandatin e Xhaçkës në Gjykatën Kushtetuese. Ky vendim do të thotë që Kuvendi është i detyruar që ta çojë një kërkesë të deputetëve për verifikim të mandatit të një deputeti në Kushtetuese dhe do të jetë kjo e fundit që do të vendosë.
‘Kushtetuesja’ ka shfuqizuar të dyja vendimet e parlamentit edhe atë që miratonte raportin e mazhorancës dhe atë që rrëzonte raportin e opozitës. Ndërkohë që ka rrëzuar kërkesën e deputetëve të ‘Rithemelimit’ që kërkonin heqjen e mandatit të Olta Xhaçkës. Sipas Kushtetueses, kjo çështje do duhej të dërgohej përmes një raporti të shprehur më parë nga Kuvendi.
Kështu që mandati i Xhaçkës do të kthehet edhe një herë në Kuvend dhe me këtë vendim të Kushtetuese, Kuvendi është i detyruar që ta çojë për shqyrtim mandatin e Xhaçkës. Kjo nuk do të thotë që mandati do t’i hiqet, ‘Kushtetuesja’ mund të mos gjejë konflikt interesi, por do të jenë anëtarët e kësaj Gjykate që do marrin një vendim të tillë. Në këtë formë zgjidhet edhe përplasja e moskompetencave mes deputetëve të PD dhe Kuvendit të Shqipërisë.
PD-ja kërkon heqjen e mandatit të Xhaçkës, pasi e akuzon se ka konflikt interesi përmes bashkëshortit të saj si investitor strategjik, gjë që ministrja e ka mohuar disa herë.
Ditën e sotme në Këshillin e Legjislacionit ish-ministri i drejtësisë Fatmir Xhafaj, u shprehë për mandatin e Olta Xhaçkës. Xhafaj insiston në ndjekjen e një procesi që është i parapërcaktuar se çfarë hapash duhet të ndiqen.
Pas vendimit të gjykatës, kuvendi vazhdon procedurat e tij, caktohen relatorët dhe pastaj vendoset për mbledhjen e komisionit. Sipas Xhafajt, ligji e përcakton, prandaj nuk mund të bëhet sipas opinionit të njërit ose tjetrit.
Fatmir Xhafaj: “Nuk e kuptoj pse daravitet kështu me lloj fjalimesh, komisioni duhet të ndjekë procedurat.
Ka ardhur vendimi i gjykatës kushtetuese, kuvendi vazhdon procedurat.
Ne dje kemi marr materialet, sot duhet të caktojmë relatorët, po të jenë gati ata, caktojmë mbledhjen e komisionit, se nuk mund ta bëjmë si e mendon njëri ose si e mendon tjetri.
E para duhet një proces, nga pikëpamja procedurirale, shikohet dokumentacioni, kontrollojnë relatorët, ne bëjmë propozimet tona dhe vendoset.”
