Ditën e sotme kryeministri Edi Rama pranoi se ka importuar energji teksa veriu i vendit po “lengon” nga përmbytjet masive. Ndërkohë kreu i PD Sali Berisha nga fshati Kuç i Shkodrës akuzoi qeverinë se e ka shitur energjinë 4 herë më lirë se sa blihet.
Gazetari Klodian Tomorri ka thënë se KESH ka shitur 8040 megavat energji me një çmim 82.2 euro per mega. Sipas Tomorrit kryeministri Edi Rama duhet të tregojë se sa më lirë po e shesim energjinë por shtoi se është një model tregu i kalbur deri në rrënjë.
Postimi i Klodian Tomorrit:
Pas thagmes se djeshme do kemi thagmen tjeter sot. Meqe kryeministri tha se na mbyti llumi i dizinformimit per punen e administrimit te Kaskades.
KESH sapo shiti 8040 megavat energji. Cmimi mesatar me te cilen u shit ishte 82.2 euro per mega. Meqe kryeministri i sulmon mediat kur shkruajne per keto pune, ne nuk po shkruajme gje.
Le t’i beje vete kryeministri krahasimet. Sa po shitet energjia publike e shqiptareve sot dhe sa po shitet energjia ne burse sot? Te na e thoje kryeministri sa here me lire se tregu po e shesim energjine. Ne nuk po themi asgje.
Ah po. Kete do e themi.
Ky eshte nje model tregu i kalbur deri ne rrenje. Sepse ne kohe prurjesh tregtaret private tallen dhe kerkojne energjine e Kaskades falur. Ndersa ne kohe thatesire qytetareve u ngulet thika deri ne palce me cmimet. Ne te dy rastet, sekseret ja vene shkelmin ne fyt qytetarit dhe interesit publik.
Cfare emri t’i veme kesaj tani?
Keq te kemi energji, keq te mos kemi. Hall te kemi reshje, hall te kemi thatesire. Keq te rruar e keq te qethur. Mallkim ne cdo skenar. Por mallkim me administrim te shkelqyer aman.