Ish-deputeti i Partisë Socialiste për 4 legjislatura dhe kryetar i Lidhjes për Drejtësi e Progres, Elmaz Sherifi, ka treguar gjatë një bashkëbisedimi se në ndryshim nga kryebashkiaku i tanishëm i Tepelenës, Tërmet Peci, ai do të investonte e këto investime do të prodhonin “florin”, do të bëheshin burim të ardhurash për bashkinë.
Sipas Sherifit, e gjitha qëndron tek shfrytëzimi i Kalasë së Ali Pashë Tepelenës që duhet të bëhet e vizitueshme, vetëm duke hequr të gjitha familjet nga Kalaja.
Përkundër kësaj deklarate, kryebashkiaku i Tepelenës, Tërmet Peci, vë në dukje kontributin e Bashkisë Tepelenë në ndihmë të banorëve, kryesisht gjatë periudhës së dimrit në zonat e bllokuara nga dëbora.
Po gjatë këtij muaji, Bashkia e Tepelenës bëri me dije investimin për rikonstruksionin e rrugës me gurë të gëdhendur, nga Pallati i Oficerëve deri te Porta hyrëse e Kalasë.
Shkrimi i plotë i Elmaz Sherifit:
Duke pirë kafe me disa miq në Tepelenë më pyetën se ç’mendoja për “rilindjen e qytetit”. Më pëlqen çdo gjë e bukur, pa dyshim dhe Tepelena ime. Kam qenë drejtor i ndërtimit kur u bënë investimet e mëdha, për spitalin, maternitetin, frigoriferin, ujësjellsin nga Benca, Shtëpinë e Oficerëve, blloqet e mëdha të banesave në Tepelenë e Memaliaj.
Si te tilla edhe investimet e fundit, por “Ku qëndron rezerva?”, ndërhyri një mik dhe “Çfarë do të bënit ju ndryshe?” Po ta jap alternativen menjëher -iu përgjigja.
Investimi është me shifra të mëdha, me miliona euro. Unë me keto euro do të hiqja të gjitha familjet nga Kalaja e Ali Pashes dhe do e bëja atë të vizitueshme për t’u bërë burim i ri i të ardhurave për Bashkinë. ALI PASHA është figura më e madhe, pas Skënderbeut. Por ne nuk e njohim sa i madh ka qenë dhe prandaj duhet të ndërtojmë muzeumin e tij brenda Kalasë Madhështore, ku të vendoset edhe “koka e paprerë” e tij. Do shikonit- u përsërita bashkebisedueseve, se sa “flori” do prodhonte ky investim dhe me parate e fituara do e zbukuroja qytetin edhe më shumë. (XH.A/SHUPLAKA)
