I drejtuan armën një personi në lokal, arrestohet 2 autorët në Shëngjin (EMRAT)

Vendparkimi i gabuar ka çuar në kanosje me armë të një ish-polici ne qytetin e Shëngjinit mëngjesin e sotëm.

Burime bëjnë me dije se dy shtetasit Eris Muça dhe Eugerto Selmani, të dy banues në Shëngjin janë futur në lokalin ku po qëndronte ish-polici Gj. N., dhe pasi janë konfliktuar me të e kanë kërcënuar me armë këtë të fundit.

Sipas po të njëjtave burime në momentin e konfliktit në lokal ndodheshin dhe persona të tjerë, duke rrezikuar dhe jetën e tyre.

Menjëherë policia e Shëngjinit është vënë në kërkim dhe ka bërë të mundur arrestimin e 2 të rinjve të cilët akuzohen për veprat penale ‘armë mbajte pa leje’ dhe ‘kanosje me armë’.

Policia Shëngjin:

Kanosën me armë zjarri pistoletë një shtetas, brenda një lokali, Policia arreston në flagrancë 2 autorët e dyshuar.

Sekuestrohen një pistoletë me municion luftarak dhe një dorezë metalike.

Pas marrjes së njoftimit së në një lokal në Shëngjin, dy shtetas ishin konfliktuar me një person, si dhe e kishin kanosur atë me armë zjarri pistoletë, shërbimet e Policisë kanë organizuar menjëherë punën dhe kanë bërë të mundur identifikimin dhe kapjen e dy autorëve të dyshuar, konkretisht të shtetasve: E. M., 29 vjeç dhe E. S., 25 vjeç, banues në Shëngjin, të cilët ishin strehuar në një banesë.

Pas kontrollit të ushtruar në banesë dhe kontrollit fizik të tyre, u gjetën dhe u sekuestruan në cilësinë e provës materiale një dorezë metalike (shtetasit E. S.) dhe një armë zjarri pistoletë me krehër me fishekë (shtetasit E. M.), e cila dyshohet të jetë pistoleta e përdorur për kanosjen e shtetasit Gj. M., për motive të dobëta.

Në vijim të veprimeve, shtetasit E. M. dhe E. S. u arrestuan në flagrancë për veprat penale “Mbajtja pa leje dhe prodhimi i armëve, armëve shpërthyese dhe municioneve”, “Kanosja” dhe “Prodhimi, mbajtja, blerja apo shitja pa leje e armëve të ftohta”.

Materialet në ngarkim të tyre i kaluan Prokurorisë pranë Gjykatës së Shkallës së Parë Lezhë, për veprime të mëtejshme.