Strukturat e Policisë së Durrësit kanë arrestuar ditën e sotme një 41-vjeçar të identifikuar si Adrian Kacmoli, një person i cili rezulton i dënuar për trafik droge me 9 vite e 3 muaj burg në Itali.
Burime për Faxnews bëjnë me dije se Kacmoli është një biznesmen i njohur në qytetin bregdetar pasi drejton një agjensi turistike.
Madje, në Shqipëri ky person gjatë këtij viti të pandemisë ka përfituar dhe nga pagat e luftës që ka dhënë qeveria, për të mbështetur bizneset.
“Strukturat e Policisë Vendore Durrës, në vijim të punës për kapjen e personave të shpallur në kërkim ndërkombëtar, si rezultat i shkëmbimit të vazhdueshëm të informacioneve me ZKQ Interpol Tirana, në bazë dhe të informacioneve të siguruara në rrugë operative, kanë bërë të mundur lokalizimin dhe arrestimin provizor të shtetasit Adrian Kacmoli, 41 vjeç, banues në Durrës.
Ky shtetas ishte shpallur në kërkim nga Interpol Roma, pasi Gjykata e Venecias/Itali e ka dënuar me 9 vjet e 3 muaj burg, për veprën penale “Shkelje e ligjit mbi narkotikët”, parashikuar nga Kodi Penal italian. Interpol Tirana, në bashkëpunim me Interpol Romën, vijojnë procedurat për ekstradimin e këtij shtetasi drejt Italisë”, thuhet në njoftimin e Policisë ndër të tjera.