Gjykata Kushtetuese ka shpallur këtë të enjte vendimin në lidhje me ankesën e subjektit të OFL, Flamur Haka, i cili kundërshtonte masën e izolimit 1-vjeçar, si edhe në tërësi ligjin e OFL për sekuestrimin e pasurive të personave të dyshuar për aktivitet kriminal.
Në fakt Gjykata ka njohur vetëm ankesën e Flamur Hakës që nuk i është mundësuar proces i rregullt gjyqësor në ankimimin e tij kundër izolimi 1-vjeccar në fshatin Zezë të Niklës.
Ndërkohë që Gjykata ka vendosur të rrëzojë kërkesën tjetër për shfuqizimin e aktit normativ Nr. 1, datë 31.1.2020 PËR MASAT PARANDALUESE NË KUADËR TË FORCIMIT TË LUFTËS KUNDËR TERRORIZMIT, KRIMIT TË ORGANIZUAR, KRIMEVE TË RËNDA DHE KONSOLIDIMIT TË RENDIT E SIGURISË PUBLIKE
GJKKO-ja, me vendimin nr. 87, datë 29.01.2021, ka vendosur masën parandaluese me natyrë personale të kufizimit të perimetrit të lëvizjes me afat 1-vjeçar, për shkak të dyshimit të ngritur për mundësinë e pjesëmarrjes së tij në kryerjen e krimeve të rënda, me qëllim garantimin e sigurisë publike dhe mundësinë e parandalimit të rrezikut për cenimin e saj. Ky izolim zgjati deri në 16.02.2022.
Flamur Haka vendosi ta kundërshtojë këtë izolim nëpërmjet avokatëve të tij, duke qenë se vetë ai nuk merrte dot pjesë në procese gjyqësore, sepse ishte i izoluar. Ankimi i tij u rrëzua në të gjitha shkallët, por Gjykata Kushtetuese pranoi faktin që Hakës nuk i është mundësuar një proces i rregullt gjyqësor në këtë rast.
Flamur Haka rezulton një person i arrestuar dhe që ka vuajtur dënim për vepra të ndryshme penale “si vjedhja me dhunë”, “rrëmbim personi” dhe “atentat”, të kryera në kuadrin e një grupi kriminal.