Raketat ruse ranë si shi në Kiev këtë mëngjes, duke goditur një bllok apartamentesh ndërsa familjet flinin. Kryetari i bashkisë së qytetit paralajmëroi se kryeqyteti ukrainas ishte nën sulm si një akt frikësimi përpara samiteve kritike të G7 dhe NATO-s.
Shpërthime të mëdha ndodhën në të gjithë qytetin disa orë pasi presidenti Zelensky bëri një lutje të përtërirë për sistemet e mbrojtjes ajrore nga aleatët e Ukrainës, ndërsa ata takohen për të vendosur për mbështetje të mëtejshme ushtarake. Ai paralajmëroi se lufta po hynte në një “fazë të vështirë moralisht dhe emocionalisht”. Sulmet me raketa ishin të parat që goditën Kievin në tre javë, duke shkatërruar një ndjenjë të brishtë qetësie pasi shumë banorë ishin kthyer në qytet për herë të parë që nga fillimi i pushtimit.
“Ka njerëz nën rrënoja”, tha Vitaly Klitschko, kryebashkiaku i Kievit.
“Ata kanë nxjerrë një vajzë shtatëvjeçare. Ajo është gjallë. Tani po përpiqen të shpëtojnë nënën e saj”, pohoi ai.
Vajza u mor me barelë, por babai i saj besohet të jetë vrarë. Është hera e dytë që zona goditet nga raketat ruse në dy muajt e fundit.
Sipas komandës ajrore të Ukrainës, disa nga raketat janë lëshuar nga bombarduesit rusë me rreze të gjatë Tu-22 të dislokuar nga Bjellorusia për herë të parë. Ato goditën pak para një takimi midis Presidentit Putin dhe aleatit të tij të vogël, presidentit bjellorus Alexander Lukashenko , gjatë të cilit lideri rus njoftoi planet për të dërguar sistemin raketor Iskander-M me aftësi bërthamore në bazat në Bjellorusi .
Putini ofroi gjithashtu përmirësimin e avionëve luftarakë bjellorusë për t’i bërë ata të aftë të mbajnë armë bërthamore.
Në fjalimin e tij të shtunën, vetëm një ditë pasi iu drejtua turmave në Glastonbury, Zelensky vuri në dukje sulmet me raketa si dëshmi të mëtejshme të nevojës që aleatët e NATO-s të vendosin sisteme të mbrojtjes ajrore në Ukrainë./The Times/
