Ka shkuar në katër numri i personave të arrestuar si të dyshuar për ekzekutimin e biznesmenit Behar Sofia në Tiranë, ngjarje kjo e ndodhur në orët e paradites së datës 25 Shkurt.
Burime bëjnë me dije se Policia ka mundur që të vërë në pranga ekzekutorin dhe tre prej bashkëpunëtorëve të tij, identitetet e të cilëve nuk bëhen me dije ende. Burimet bëjnë me dije se ata janë nga zona e Fushë Krujës dhe e Krrabës, ndërkohë që prokuroria po këmbëngul që ata të bëhem bashkëpunëtor të drejtësisë, në mënyrë që të rrëfejnë porostitësit.
Ekzekutimi i Sofisë dyshohet se është kryer nga vrasës me pagesë, ndërkohë që ende nuk dihet se kush ka dashur ta eleminonte biznesmenin Sofia, i cili ka qenë i dyshuar dhe për trafikimin e heroinës nga Turqia drejt Shqipërisë.
Mësohet se personi që ka qëlluar me armë silensiator Sofinë është 24-vjeçari Ernejt Shyti, i cili u arrestua gjatë ditës së djeshme në Malin e Zi, dhe u soll drejt Tiranës, ku dhe është marrë në pyetje nga ana e Policisë.
Shyti e ka pranuar vrasjen, dhe është zbuluar nga gjurmët e ADN-së që kishte lënë në rroba. 24-vjeçari jetonte në një banesë me qera së bashku me nënën e tij në rrugën ‘Bardhyl’.
Pas krimit, autori mori biçikletën të cilën e kishte lënë poshtë urës së Lanës dhe u largua drejt liqenit artificial. Aty ndërroi rrobat, maskën anti-Covid dhe kapelen. Rrobat u gjetën 3 ditë pas ngjarjes nga ku u përftua profili gjenetik nga i cili u zbulua edhe identiteti.
I riu e ka ndjekur 3 ditë me radhë Behar Sofinë dhe lëvizjet që biznesmeni bënte, nga shtëpia e tij. Mësohet se shuma që është paguar për ekzekutimin e Sofisë është 50 mijë euro.
Si ndodhi ekzekutimi?
Burimet, tregojnë se viktima ka qenë duke pirë kafe poshtë banesës së tij, në katin e dytë të një qendre tregtare pranë rrugës së Elbasanit, një lokal të cilin ai e frekuentonte shpesh dhe që gjithnjë ishte nën prani të personave të tjerë, Të njëjtin itinerar, Sofia e ndoqi edhe të enjten. Ai piu kafe herët në mëngjes dhe doli për të bërë një shëtitje, dy ditë pasi kishte kaluar Covid-19.
Sipas informacioneve, autori e kishte pritur në urën midis zonës se Piramidës dhe katedrales katolike të Shën Palit. Më pas, ai e ndjek për rreth 30 metra dhe e qëllon shumë pranë, një plumb e kap në trup dhe një në kokë. Kamerat e sigurisë tregojnë se autori ka qenë i veshur me një kostum sportiv ngjyrë të errët, me kapuç dhe me maskë mbrojtëse anticovid. Ai është larguar qetësisht pas atentatit, drejt bulevardit Dëshmorët e Kombit. Më pas ka marrë një biçikletë dhe është drejtuar në zonën e Liqenit Artificial të Tiranës.
Kush është Behar Sofia?
Behar Sofia, rezulton të jetë një përkrahës i njërës prej partive politike në vend dhe me njohje të shumta në policinë e shtetit, duke qenë edhe një biznesmen i suksesshëm në Tiranë. Viktima rezulton me disa biznese në zonën pranë stadiumit Dinamo, por shpesh ka pasur konflikte dhe në biznese i kanë vendosur edhe eksploziv. Sofia, në vitin 1998 u arrestua në Turqi së bashku me trafikantin Abdulselam Turgut, pasi u kapën me rreth 30 kg heroinë.
Mes te arrestuarve ishte edhe Hekuran Hoxha, i cili u arrestua përsëri në 2019, për llogari të operacionit Volvo 4 dhe i dyshuar se është kreu i grupit të laboratorit të kokainës në Has. Turgut, tashmë është shpallur në kërkim, pasi donte të kryente një atentat terrorist në Kryegjyshatën Botërore Bektashiane në vendin tonë.
(E.K/Faxweb.al)
Discussion about this post