Zbulohet identiteti i shqiptares së përfshirë në një aksident të tmerrëshëm natën e mbrëmshme në Itali. Ajo është Valeria Daci, 37-vjeçarja me origjinë shqiptare. Shqiptarja ka gjetur vdekjen e menjëhershme në vendin e aksidentit.
Mediat italiane shkruajnë se ajo punonte si pastiçiere në një lokal në Biancavilla. Punonjësit e lokalit ishin të fundit që e panë atë gjallë. Valeria, nënë e një vajze, punonte në Biancavilla prej një viti e gjysmë.
Aksidenti tragjik ka ndodhur rreth orës 19:45 për shkak të përplasjes mes dy makinave, një “Ford Ka” dhe një “BMW”. Si pasojë, një 27-vjeçar italian është plagosur rëndë.
Mësohet se shqiptarja, e cila drejtonte makinën tip “Ford”, po shkonte për në Paterno, e për arsye ende të paqarta, në një kthesë, makina e shqiptares është përplasur fort kokë më kokë me BMË-në që lëvizte në drejtim të kundërt.
Përplasja thuhet se ka qenë aq e fortë sa “Ford”-i është shkatërruar.Ndërsa viktima, ka fluturuar nga makina dhe është përplasur në asfalt.
Ata që kanë ofruar ndihmën e parë pas aksidentit kanë qenë shoferët që lëviznin në ato momente në rrugë. (E.K/SHUPLAKA)