Kryeministri Edi Rama gjatë takimit elektoral të mbajtur në Njësinë nr.1 në kryeqytet, atakoi programin ekonomik të Partisë Demokratike, ku u shpreh me ironi se Basha premton vetëm lekë, por në fund do i fusë mbështetësve të tij dy gishtat në sy.
Në lidhje me këtë deklaratë ka reaguar dhe vetë kryedemokrati, i cili u shpreh se tashmë shqiptarët e kanë të qartë se ku e ka çuar vendin rrugëtimi 8-vjeçar i Ramës në qeveri. Ndaj Basha i bëri thirrje të gjithë shqiptarëve që të dalin masivisht të votojnë ndryshimin më 25 Prill.
‘’Rruga 8-vjeçare dihet se ku na ka çuar. Projeksionet e kësaj rrugë dihen po ashtu, i ka publikuar OKB-ja. Që me këto ritme Shqipëria do të katandiset në një vend me 1 milionë njerëz, shumica mbi moshën 55 vjeç. Ndaj, edhe pyetja me 25 prill është: do ta lejojmë këtë të ndodhë? Pas 8 vitesh dështimesh a do t’i hapet prapë dera dështakut për herë të tretë edhe 4 vjet të tjera? Sigurisht që jo! Këtë e dëgjoj kudo. Jo thoni ju, jo thotë Shkodra, jo thotë Vlora, Korça, Fieri dhe Berati. Pra, miqtë e mi mos harroni entuziazmi juaj është paralajmërimi i ndryshimit, por ndryshimi i vërtetë është përgjegjësia juaj.
Entuziazmi juaj është paralajmërimi i ndryshimit, por ndryshimi i vërtetë është përgjegjësia juaj. Gjithsecili prej nesh këtu një votë ka. Është përgjegjësia juaj që të dilni masivisht më 25 prill, që mos të lini asnjë shok, asnjë mik, asnjë familjarë që mund të votojë, pa dalë për të votuar. Vetëm kështu mund të vij ndryshimi. Vetëm duke dal të gjithë, duke votuar numrin 9 do të vij ndryshimi të cilin e duan dhe e presin dhe e meritojnë të rinjtë shqiptarë dhe prindërit e tyre.’’- tha Basha.