6 persona, punonjës të një fabrike që prodhon tela në zonën e Bathores, u dërguan në spital për ndihmë mjekësore ditën e djeshme në QSUT, në repartin e toksikologjisë, për shkak të disa problemeve me shëndetin.
Gjatë ditës së sotme burime bëjmë me dije se të gjithë punonjësit kanë lënë ambientin e spitalit.
Gazetarja e Fax news Xhoana Çollaku, e cila ka qenë sot në zonën e Bathores, për të pyetur përfaqësues të fabrikës në lidhje me incidentin e ditës së djeshme, është përballur me refuzimin nga ana e tyre për të folur.
Në këtë fabrikë bëhet fjalë që punojnë 3 mijë punonjës. Sipas rrëfimeve të tyre nuk kanë pasur probleme më herët në lidhje me kushtet e punës, ndërsa thonë se janë të kënaqur, jashtë kamerave, me trajtimin që iu është bërë.
Nga ana e autoriteteve nuk ka një deklarim se çfarë e ka shkaktuar incidentin e djeshëm në fabrikë, që pasoi me problemet shëndetësore për 6 punonjës.
Vetëm mesditën e sotme pranë fabrikës janë shfaqur Inspektorët e Kujdesit Shëndetësor, që pritet të mbledhin edhe të dhëna për incidentin që ka shkaktuar toksikimin e punonjësve.
